ស្រ្តីម្នាក់បានធ្វើឲ្យមនុស្សជាច្រើន សម្តែងនូវក្តីអាណិតអាសូរជាខ្លាំង ខណៈកាលពីថ្ងៃទី៨ ខែកក្កដា ឆ្នាំ២០២០ បានបង្ហោះវីដេអូស្វែងរកយុត្តិធម៌និងការជួយអន្តរាគមន៍ពីមហាជន នៅលើបណ្តាញ Tik Tok ដោយរៀបរាប់ថាខ្លួនត្រូវបានថៅកែហាងគុយទាវអង្គរជុំវាយនិងគំរា មសម្លាប់។
ស្រ្តីរងគ្រោះបានរៀបរាប់ឲ្យដឹងថា រូបនាងត្រូវបានមិត្តភក្តិណែនាំឲ្យទៅអង្គុយញ៉ាំបាយកំដរភ្ញៀវ ដើម្បីទទួលបានលុយធីប 20$ នៅហាងមួយកន្លែង។ បន្ទាប់ពីញ៉ាំបាយរួច ភ្ញៀវ២នាក់បានបើកឡានជូននាងត្រឡប់ទៅផ្ទះវិញ តែនៅតាមផ្លូវលើរថយន្តភ្ញៀវម្នាក់បានបបួលនាងទៅរួមភេទ ដោយសន្យាថាឲ្យប្រាក់ 100$ តែនាងបានបដិសេធទៅជាមួយ ក៏រឿងជាប្រកែកគ្នាឈានដល់ភ្ញៀវនោះវាយនាងបណ្តាលឲ្យរងរបួសដាច់និងជាំលើផ្ទៃមុខច្រើនកន្លែង។
ស្រ្តីរងគ្រោះបន្តថា សំណាងហើយ ដែលរូបនាងបានបើកកញ្ចក់ទ្វារថយន្ត ស្រែកឲ្យគេឯងជួយទេ នោះមិនដឹងថា ជីវិតនាងនឹងយ៉ាងណានោះទេ។ មិនត្រឹមតែប៉ុណ្ណឹងទេ ជនដៃដល់ក៏បានគំរាមសម្លាប់នាងផងដែរ ប្រសិនជានាងហ៊ានប្តឹងរឿងនេះទៅសមត្ថកិច្ច។
ទោះយ៉ាងណា នាងមិនខ្លាចស្លាប់ និងបន្តបង្ហោះរៀបរាប់អំពីរឿងរ៉ាវដែលបានកើតឡើងមកខ្លួន នៅលើបណ្តាញសង្គម Tik Tuk និងបន្ទាប់មកមានការជម្រុញលើកទឹកចិត្ត ពីបងប្អូនជាច្រើន ទីបំផុត នាងក៏សម្រេចចិត្តទៅដាក់ពាក្យបណ្តឹងទៅកាន់សមត្ថកិច្ចជំនាញនៃការិយាល័យប្រឆាំងការជួញដូរមនុស្ស នៃកងរាជអាវុធហត្ថរាជធានីភ្នំពេញ ដែលបានអនុវត្តតាមនិតិវិធី រហូតឈានដល់ធ្វើការឃាត់ខ្លួនជនសង្ស័យឈ្មោះ កៅ ណូរ៉ា ដែលជាមេការហាងគុយទាវអង្គរជុំ សាខាបឹងសាឡាង នាថ្ងៃទី១១ ខែកក្កដា ឆ្នាំ២០២០ និងបានបញ្ជូនដល់តុលាការតាមនិតិវិធីនាព្រឹកថ្ងៃទី១៣ ខែកក្កដា ឆ្នាំ២០២០ ហើយ៕
