ប្អូនស្រី លៀង ចាន់ឡា ជាអតីតបេក្ខនារី ក្នុងកម្មវិធីប្រលងចម្រៀងលំដាប់កំពូលល្បីទូទាំងពិភពលោក X Factor Cambodia បើទោះជាពុំទទួលបានពានរង្វាន់ក៏ដោយ ក៏ប្រជាប្រិយរបស់អតីបេក្ខនារីរូបនេះ នៅតែទទួលបានការគាំទ្រខ្លាំងដដែល ពីសំណាក់មហាជនទូទៅ មកដល់សព្វថ្ងៃនេះ។
ពិតមែនហើយ ចាន់ឡា បានល្បីឈ្មោះមកទល់ពេលនេះ ក៏ដោយសារផ្តើមចេញពីអ្នកលេងបណ្តាញសង្គម ដែលមានក្តីអាណិត បានបំផុសថា «នាងត្រូវបានរើងអើង ពីសំណាក់សមាជិកក្រុមរបស់នាង» ព្រោះគេមើលឃើញថា នាងឃ្លាតតែឯង រីឯសមាជិកក្រុមរបស់នាងច្រៀងដោយឡែកតែពួកគេ នៅក្នុងវគ្គមួយនៃកម្មកម្មវិធីប្រលងចម្រៀងលំដាប់កំពូលនេះ។
ការបំផុសរឿងនេះឡើង បានធ្វើឲ្យ ចាន់ឡា ទទួលបានក្តីអាណិតអាសូរកាន់តែខ្លាំង រហូតមានសប្បុរសជនបានជួយឧបត្ថម្ភដល់រូបនាងជាច្រើន និងសូម្បីហាងកែសម្ផស្សមួយ ក៏បានទទួលយករូបនាងទៅកែសម្ផស្សដោយឥតគិតថ្លៃផងដែរ ដែលធ្វើឲ្យរូបនាងប្រែមុខមាត់ថ្មី ទទួលបានការចាប់អារម្មណ៍ជាខ្លាំង។
ក្រោយកែសម្ផស្ស ចាន់ឡា ហាក់ប្រែជីវិតថ្មីមួយគួរឲ្យកត់សម្គាល់ ដោយក្នុងនោះមានកម្មវិធីមួយចំនួន បានអញ្ជើញរូបនាងទៅសម្តែងជារឿយៗផងដែរ។ ដោយឡែក ថ្មីៗនេះ កញ្ញា លៀង ចាន់ឡា បានបង្ហោះសារមួយ ធ្វើឲ្យអ្នកគាំទ្រមានការចាប់អារម្មណ៍ និងសរសើរគ្រប់ៗគ្នាថា បើទោះជានាងមានឈ្មោះល្បីក៏ពិតមែន តែនាងមិនភ្លេចកំណើត ចំពោះអ្នកដែលបានជួយជ្រោមជ្រែងរូបនាងឲ្យមានថ្ងៃនេះឡើយ។
ក្នុងនោះ ចាន់ឡា បានបង្ហោះនៅលើគណនីហ្វេសប៊ុករបស់ខ្លួន ដោយសរសេររៀបរាប់យ៉ាងដូច្នេះថា៖ «ស ខ្មៅ ជាពណ៌ដែលស្រលាញ់បំផុត តែចិត្តវិញគឺពណ៌ស រស់នៅជីវិតបែបសាមញ្ញ គ្មានភាពស៊ីវីល័យ តែពេលនេះសុំធ្វើខ្លួនសារជាថ្មីរស់នៅលើវិថីសិល្បៈ មិនចូលចិត្តភាពអាត្មានិយម ចាន់ឡា នៅតែជា ចាន់ឡា ជាផ្កាឈូកដុះចេញពីភក់ ជាក្របីស្រុកស្រែ តែខ្ញុំមិនមែនក្រពើ ខ្ញុំមិនដែលភ្លេចគុណអ្នកដែលជួយខ្ញុំទេ»។
គួរបញ្ជាក់ថា កញ្ញា ចាន់ឡា សុខៗបានលើកឡើងដ៏ចាក់ដោតយ៉ាងដូច្នេះ គឺស្របពេលដែលតារា Tik Tok សុខា កំពុងផ្ទុះកក្រើកធ្វើឲ្យមនុស្សជាច្រើនស្អប់យ៉ាងខ្លាំង ទាក់ទងរឿងចោទប្រកាន់ថាជាមនុស្សរមើលគុណ ចំពោះអ្នកដែលបានខំជួយ៕
