កាលពីវេលាម៉ោង១រំលងអធ្រាត្រឈានចូលថ្ងៃទី២៧ ខែមិថុនា ឆ្នាំ២០២០ មានករណីគ្រោះថ្នាក់ចរាចរណ៍ដ៏រន្ធត់មួយ ដោយរថយន្តមិនស្គាល់អត្តសញ្ញាណ១គ្រឿង បានបុកម៉ូតូម៉ាក CPX ១គ្រឿង បណ្តាលឲ្យបុរសម្នាក់ជាអ្នកឌុបរងរបួសធ្ងន់ធ្ងរបញ្ជូនទៅសង្គ្រោះបន្ទាន់ ខណៈនារីស្រស់ស្អាតម្នាក់រួមដំណើរជាមួយ រងរបួសធ្ងន់ស្លាប់នៅនឹងកន្លែងកើតហេតុយ៉ាងអាណោចអាធម ស្ថិតនៅតាមបណ្ដោយផ្លូវ១៤៣ កែងផ្លូវ៣១០ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។
យុវតីដែលបានស្លាប់មានឈ្មោះ គ្រី សុដាឡែន (គណនីហ្វេសប៊ុក Ah Jruy) អាយុ ១៨ ឆ្នាំ រៀនថ្នាក់ទី១២ នៅវិទ្យាល័យទួលទំពូង ស្នាក់នៅក្នុងសង្កាត់បឹងសាឡាង ខណ្ឌទួលគោក និងមានស្រុកកំណើតនៅ ខេត្តបាត់ដំបង។ ចំណែកបុរសរងគ្រោះធ្ងន់ត្រូវបញ្ជូនទៅសង្គ្រោះនៅមន្ទីរពេទ្យមានឈ្មោះ ទៀប គឹមហេង អាយុ ២០ ឆ្នាំ ជាអតីតកីឡាករបាល់ទាត់ជម្រើសជាតិ U16 ។
បើតាមប្រភព័ត៌មានមិត្តភក្តិនារីរងគ្រោះនៅកន្លែងកើតហេតុ នោះអ្នកទាំងពីរ ក៏ត្រូវបានដឹងថាជាសង្សារនឹងគ្នា បានជួបគ្រោះថ្នាក់អកុសលនេះ បន្ទាប់ពីពួកគេចេញមកពីចូលរួមពិធីខួបកំណើតមិត្តភក្តិ។
ដោយឡែក រថយន្ដជនបង្កហេតុ ពុំទាន់ស្គាល់អត្ដសញ្ញាណនៅឡើយនោះទេ ក្រោយបានបុករួចអូសម៉ូតូជនរងគ្រោះគូសង្សារខាងលើ ចម្ងាយជាង៣០ម៉ែត្រ ហើយរត់គេចខ្លួនបាត់តែម្ដង។ បច្ចុប្បន្នសមត្ថកិច្ចកំពុងស្រាវជ្រាវស្វែងរកជនបង្កមកផ្ដន្ទាទោសតាមផ្លូវច្បាប់៕
