កំពង់ធំ ៖ នៅព្រឹកថ្ងៃទី១៧ ខែវិច្ឆិកា ឆ្នាំ២០២០ សមត្ថកិច្ចកងរាជអាវុធហត្ថខេត្តកំពង់ធំ បានសួរនាំលោក ម៉ៅ ប៊ុនធូ នាយកទីចាត់ការអន្តរវិស័យសាលាខេត្តកំពង់ធំ ពាក់ព័ន្ធករណីប៉ុនប៉ង មនុស្សឃាត ដោយយកកាំបិត ប៉ុនប៉ងចាក់ ក មកលើលោក សាយ វាសនា ព្រះរាជអាជ្ញារងនៃអយ្យការអមសាលាដំបូងខេត្តកំពង់ធំ ប៉ុន្តែមិនបានសម្រេច ។
រឿងហេតុកើតឡើងកាលពីយប់ថ្ងៃទី១៦ ខែវិច្ឆិកា ឆ្នាំ២០២០ វេលាម៉ោងជាង៩យប់ នៅភោជនីយដ្ឋានជ្រោះពេជ្រចិន្តា បន្ទប់ «កែប» ដែលមានអាស័យដ្ឋានស្ថិតក្នុងភូមិបល្ល័ងលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ខណៈលោក សាយ វាសនា ព្រះរាជអាជ្ញារង រួមជាមួយលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ, លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ, លោក ព្រហ្ម វាសនា អនុប្រធានមន្ទីរស្រាវជ្រាវព័ត៌មានសន្តិសុខកងរាជអាវុហត្ថខេត្តកំពង់ធំ, ឈ្មោះ លី យ៉ាស៊ីន និង ឈ្មោះ ព្រាម ហាក់ កំពុងហូបចុកអាហារសាមគ្គីជុំគ្នា ។ បន្ទាប់ពីធ្វើសកម្មភាពរួច ជនល្មើស ធ្វើអាកប្បកិរិយា ស្រវឹង ធ្វើដូចមិនដឹងរឿងអី និងមានរឿងអ្វីកើតឡើងអញ្ចឹង ។
បើតាមប្រភពព័ត៌មានពីសំណាក់មហាជនខ្សឹបខ្សៀវប្រាប់ឲ្យដឹងថា ជនល្មើសនេះ បានចងគំនុំនឹងលោក សាយ វាសនា ជាយូមកហើយ ព្រោះ លោក សាយ វាសនា បានទទួលបន្ទុក ក្នុងសំណុំរឿងដែលជនល្មើសបានដឹកនាំកម្លាំង ចុះទៅចាប់គ្រឿងចក្ររបស់ឈ្មោះ ជុត ថាន ដោយមិនបានឆ្លងយោបល់ និងរាយការណ៍ដល់ព្រះរាជអាជ្ញា ហើយមានច្បាប់អនុញ្ញាតត្រឹមត្រូវពីអភិបាលខេត្ត និងមន្ទីរជំនាញពាក់ព័ន្ធ ដោយបុគ្គលនេះមិនមានសម្បទាជាមន្ត្រីនគរបាលយុត្តិធម៌ បន្ទាប់មក ជនល្មើសបានស្នើសុំឲ្យលោក សាយ វាសនា កុំចាត់ការក្នុងសំណុំរឿងនោះ ប៉ុន្តែលោក សាយ វាសនា បានអនុវត្តតាមនីតិវិធីច្បាប់ ព្រោះថា ឈ្មោះ ជុត ថាន មិនព្រមចរចា ហើយជនល្មើសគុំគួនតាំងពីពេលនោះមករហូត ។
បន្ទាប់ពីធ្វើសកម្មភាពរួច គេឃើញមានវត្តមាន លោក ស៊ិន វីរៈ ព្រះរាជអាជ្ញាអមអយ្យការសាលាដំបូងខេត្តកំពង់ធំ បានចុះទៅដល់កន្លែងកើតហេតុភ្លាមៗ ហើយបញ្ជាឲ្យកម្លាំងអាវុធហត្ថឃាត់ខ្លួន ជនល្មើសនាំខ្លួនមកបញ្ជាការដ្ឋានកងរាជអាវុធហត្ថខេត្តកំពង់ធំ ដើម្បីកសាងសំណុំរឿងបន្តតាមនីតិវិធី ៕
